" ماي ستاتس "

أنا ماحب الفيس بوك بشكل عام .. بس طريقة استخدام العرب للفيس بوك

تضحك وتبط الجبد في نفس الوقت .. يعني ماركة شر البلية ما يضحك .. هو العرب يبطون الجبد في طريقة استخدامهم لأغلب الأشياء .. بس الأمور اللي تتعلق بالنت .. هذي المصاخة فيها وصلت إلى حد الإبداع .. لا وعاد كله يقول لك العرب ما هم مبدعين .. يالله ما عليك غيرانين منّا
نرد للفيس بوك .. إش سالفة البنات ويا الستاتس؟؟
لا بصراحة .. اش سالفة البنات ويا الستاتس؟؟؟
خل نجوف ستاتس وحدة من البنات خلال 24 ساعة:

6.00 نايمة

6.15 ستل نايمة

6.16 مابي أقوم

6.18 لازم أقوم

6.19 صباح الخير أوووول ;)

6.21 قمت

6.23 أغسل ويهي

6.35 مادري شنو ألبس

6.55 أتمكيج

7.08 ها آنه حلوة؟

7.13 أتريق

7.26 أسوق

8.05 في المكتب

9.12 أبي أنام

9.30 الدوام طوييل

2.15 يااي خلص الدوام

بس عشان التوضيح اللي يبي يعرف شنو يحصل في الفترة بين تسع ونص وثنتين وربع المسألة بسيطة .. تلفونات .. بي بي أم .. مسجات .. إي ميلات .. وطول الوقت طبعا الفيس بوك مفتوح على بت سوسايتي أو فارم فيلا.

المهم نكمل ستاتس صديقتنا

2.20 أسوق

2.33 اففففففف زحمة

2.40 واحد سخيف يغازل

سوري على المقاطعة بس عشان التوضيح .. لما وحدة تقول واحد سخيف يغازل ..

المسألة كلها في شي واحد ... إن شكله مو عاجبها فقط لا غير

2.58 وصلت البيت

3.04 في غرفتي

3.22 في الحمام

3.30 أتغدى

3.47 ملل

4.05 أطالع تي في

4.11 أحب هالأغنية

4.32 أفكر أطلع

4.35 ممممممم

4.37 مادري اطلع ولا اطلع

4.41 شكلي باطلع

4.59 طلعت

5.25 انا ألحين طالعة

5.54 خوش طلعة

6.23 مابي الطلعة تخلص

6.35 أمي متصلة تقول ردي :(

7.20 رجعت من الطلعة :(

7.22 هوووم

7.45 تعبانة

8.33 مابي ازعاج :@

9.42 أبي انام

9.53 ما فيني نوم

9.58 بكرة دوام

10.06 شكلي بنام

10.23 أظن اني نمت

10.24 إي شكلي نمت

10.26 جود نايت أوووول امممممح ;)

6.00 نايمة

( وهلم جرى)

!!!هذي حالتها 24 ساعة بالتفصيل السخيف الممل

لا واللي يضحك إن هذي حالتها كل يوم

والله ناس فاضية( طبعا ألحين في مليون وحدة تقول خلك انت المليان )

بعدين اش سالفة صباح الخير كلكم .. وجود نايت أول ... وأحبكم كل أبوكم ؟؟؟؟

يعني ألحين تبين تقولين لي ان الخمس مئة وستين اسم اللي ضايفينج كلهم ربعج ويمونون؟؟

وكلهم تعرفينهم وتصبحين وتمسين عليهم وتوزعين عليهم بوسات صباحية ومسائية من زود المحبة؟؟
شنو ؟؟ مشاعر بلاش ؟؟؟

بعدين شنو سالفة الأغاني ؟؟ كل ما عجبها مقطع راحت وحطته !! .. عاد يا ليت تكتب صح ... أخطاء إملائية بالهبل ..

وكل خمس دقايق مغيرة الستاتس بأغنية ثانية .. هذي روتانا مو ستاتس

واللي أفضى من هالخبال وستاتس البنات طبعا الشباب اللي ما صدقوا وحدة غيرت الستاتس ...

فوووووووووو ( يازعم بسرعة عشان يكون أول واحد يرد عليها )عاد خذ الردود اللي تبط المرارة وتييب الهم في عصر يوم العيد وانفلونزا الحمير في زمن الكوليرا طبعا العملية كلها عملية .. عملية .. لحظة بتيي الكلمة ..

عملية .. ممممم مب ياية الكلمة .. خل اخترع كلمة .. عملية تكاملية ( تذكرت التكامل والتفاضل في الرياضيات ) ..

يعني سخافة البنات في تغيير الستاتس مرة كل عشر ثواني .. هي مبنية على بلاهة الشباب

وعملية الريس ( الريس يعني سباق سيارات ) اللي تتم (حلوة تتم) بين الشباب عشان كل واحد

يكون هو أول من يرد على البنية وعلى الستاتس مالها بما معناه..

إن لو كل وحدة غيرت الستاتس مالها والشباب عطوها طاف أو السين أو إجنور ( طبعا مراعاة لمختلف الثقافات ) والله تشوف

الستاتس مال الفيس بوك يخيس اسبوع ولا وحدة تفكر تغيره

وحدة كاتبة هووووم ... تلاقي واحد راد عليها مالج حل... يعني شنو مالها حل؟؟؟ لا ويحط وياها غمزة ;) ياخي متعلم جملة مالج حل وودك تحطها فهمنا، الغمزة إش دخلها؟؟؟ البنت متفرغة وتقول إن هي في البيت.. إنت من اللي داس لك على طرف؟؟

بس تبي الصج؟ إنت اللي مالك حل

عاد يعجبك اللي يا زعم رومانسي بو جماعة فديتج وتسلمين لي وأروح فدوة لعيونج بسببب وبدون سبب يتفدّى ..

وحدة حاطة في الستاتس ملل .. الحبيب على طول يفداج الملل ...

واللي يعلقون على الصور .. اوووووووووووووووووه هذي خلهم على صوب أنا بس أبي اعرف شي واحد .. وحدة حاطه حاجبها .. اوكي ما قلنا شي .. رايحة الصالون وحافة حواجبج .. بس احنا شكو؟؟؟؟

وخذ التعليقات .. طبعا ربعنا ماركة مالج حل لازم تحصل خمسة أو ستة منهم يتغزلون .. بس تحصل ناس داشين من صجهم..

يعني رايحين فيليينج من قلب .. لا وبعد بالفصحى "" ما شاء الله على جمالكي "" .. لحظة انت؟؟؟ جمالكي من وين ؟؟؟

اسمها جمالك بالكسرة مو بالياء .. داش بو فصيح وانت ما تعرف تكتب اش ماله؟؟؟

بعدين تعال ياخي .. أي جمال وانت كل اللي شفته حاجب على شكل ثمانية .. يشبه حاجب هذيج الممثلة الكويتية اللي مسوية عميلة تجميل أدري أحين كل واحد يفكر .. اممممممم أي وحدة؟. لأن ما بقت وحدة ما نفخت براطمها.. تقول دعاية تواير باصات الحج والعمرة

وحدة حاطة صورة ممثلة تركية .. في واحد ثور راد عليها : عليج خوش جسم عندج مسنجر؟ ... أخخخخ لو أحصلك والله أشتغل عليك طراقات لين أخلي ويهك يتغيّر جلده مثل الحيّة ... أحين ويا ويهك انت مصدق إن صاحبة الصورة مسويتك أد؟ إنت احمد ربك ان الفيس بوك رضوا يسوون لك أكاونت ولا أشكالك حتى كمبيوتر ما يعطونهم.. طبعا الاخت عايشة الدور، ردت عليه تسلم عيونك أحلى .. ألحين انتي وين جفتي عيونه؟؟ بعدين ليش عايشة الدور ويا ويهج؟ أقصاج بقايا حجاج إنتي أو من ماركة اللي يجوفج

ما يعرف انتي انتي ولا انتي خدامتكم الأثيوبية .. مالت بس مالت

بعدين اش سالفة بوق الصور؟؟كل وحدة جيكرة باقت صورة شفايف حلوة وحطتها ..

لا وتكتب تعليق .. هذي حمرة يديدة أول مرة أحطها في عرس رفيجتي سمر ..
وهي لا عندها رفيجة اسمها سمر ولا ونتر ولا بطيخ

يعني معقولة تشوف صورة في سبع بروفايلات وكل وحدة تحلف انها صورتها .. ياخي شنو هالجذب؟؟؟

طبعا مابي أتكلم عن اللي واقفين جدام المنظرة ويصورون لأن حركة الفلاش اللي يلمع في المنظرة الصراحة مالها حل ;)

موضوع الصور موضوع طويل غريب عجيب لا يخلو من إبداعات العرب طبعا ... فالأفضل أخليه حق موضوع ثاني

اووووه قبل ما أنسى

أنا في الدوام .. صباح الخير أووول .. أحبكم كلكم .. مالكم حل ;) :My Status

*

@ مالي حل - 3 نوفمبر 2009